زندگی کُوئے ملامت میں تو اَب آئی ہے

زندگی کُوئے ملامت میں تو اَب آئی ہے
اَور کُچھ چاہنے والوں کے سبب آئی ہے

ہم فقیروں میں کسی طور شکایت تیری
لب پہ آئی بھی تو تا حدِ ادب آئی ہے

پُھول سے کِھلتے چلے جاتے ہیں جیسے دل میں
اس گلستاں میں عجب موجِ طرب آئی ہے

میری پوشاک میں تارے سے اچانک چمکے
کِس کے آنگن سے یہ ہوتی ہوئی شب آئی ہے

کِس سے پُوچھوں پسِ دیوار چمن کیا گزری
میرے گھر میں تو ہوا مُہر بہ لب آئی ہے

کون سے پُھول تھے کل رات تیرے بستر پر
آج خوشبُو تیرے پہلو سے عجب آئی ہے